வங்கக் கடலின் மேற்கு-மத்திய மற்றும் அதனை ஒட்டிய தென்மேற்குப் பகுதிகளில் நிலவும் ‘முரசு’ (Murasu) புயல், தீவிர புயலாக வலுவடைந்துள்ளதாக வானிலை ஆய்வு மையம் தெரிவித்துள்ளது.
இதனால், மன்னார் முதல் காங்கேசன்துறை வழியாக திருகோணமலை வரையிலான கடற்கரைக்கு அப்பால் உள்ள ஆழ்கடல் பகுதிகளுக்குச் செல்ல வேண்டாம் என்றும் கடற்படையினருக்கும் மீனவர்களுக்கும் அறிவுறுத்தப்பட்டுள்ளது.
இந்தக் கடல் பகுதிகளில் நடவடிக்கைகளில் ஈடுபட்டுள்ள கடற்படையினரும் மீனவர்களும் மிகுந்த எச்சரிக்கையுடன் இருக்குமாறும், வானிலை ஆய்வு மையம் அவ்வப்போது வெளியிடும் முன்னறிவிப்புகள் மற்றும் அறிவிப்புகளைக் கவனிக்குமாறும் கேட்டுக்கொள்ளப்படுகிறார்கள்.
வங்க கடலில் தாக்கம் செலுத்தும் ‘முரசு’ (Murasu) புயல், இன்று (02) காலை 05:30 மணிக்கு, வட அட்சரேகை 13.9° மற்றும் கிழக்கு தீர்க்கரேகை 81.8° ஆகிய ஆயத்தொலைவுகளுக்கு அருகில் நிலை கொண்டிருந்ததாக அந்த மையம் குறிப்பிட்டுள்ளது.
இந்தத் தீவிர புயல் வடமேற்கு திசையை நோக்கி நகர்ந்து, இன்று (02) நள்ளிரவுக்கும் நாளை (03) அதிகாலைக்கும் இடைப்பட்ட நேரத்தில், தெற்கு ஆந்திரப் பிரதேச கடற்கரையைக் கடக்கக்கூடும் என்று எதிர்பார்க்கப்படுகிறது.
கீழே உள்ள வரைபடத்தில் ‘எச்சரிக்கை’ (Warning) என குறிப்பிடப்பட்டுள்ள கடல் பகுதிகளில் காற்றின் வேகம் அவ்வப்போது மணிக்கு 70 முதல் 80 கி.மீ வரை அதிகரிக்கக்கூடும் என்றும், பலத்த இடியுடன் கூடிய மழையும் பெய்யக்கூடும் என்றும், கடல் மிகவும் கொந்தளிப்பாகக் காணப்படும் என்றும் வானிலை ஆய்வு மையம் எச்சரித்துள்ளது.
எனவே, வட அட்சரேகை 10° – 17° மற்றும் கிழக்கு தீர்க்கரேகை 80° – 90° ஆகிய ஆயத்தொலைவுகளுக்கு இடைப்பட்ட ஆழ்கடல் பகுதிக்குச் செல்ல வேண்டாம் என்று கடற்படையினருக்கும் மீனவர்களுக்கும் அறிவுறுத்தப்படுகிறது. மேலும், தற்போது அந்தப் பகுதிகளில் ஈடுபட்டுள்ளவர்கள் பாதுகாப்பான இடங்களுக்குச் செல்லுமாறு கேட்டுக்கொள்ளப்படுகிறார்கள்.